Útilífsskóli Hraunbúa

Upp úr 10 í morgun fórum við með strætisvagni upp að Hvaleyrarvatni og lögðum af stað í hike um svæðið. Í hádeginu bauð Útilífsskólinn svo upp á grillaðar pylsur og djús sem runnu ljúflega ofan í mannskapinn. Þegar allir voru búnir að fá fylli sína hófst póstaleikur. Þar var meðal annars farið á kanóa út á vatnið, farið í refaleit með snjóflóðaýlum, haldin sandkastalakeppni og búin til skemmtiatriði. Eftir kaffið rölti hópurinn í varðeldalautina og var þar haldin fínasta „kvöld“vaka þar sem mikið var sungið og allir flokkar sýndu sín skemmtiatriði.

Dagurinn hófst með leikjum og flokkarnir máluðu steinakarlana sem gerðir voru í gær. Þegar allir karlarnir voru tilbúnir lögðum við af stað á hjólum út á Álftanes. Við áðum við skólann og lékum okkur á þessum skemmtilega leikvelli og borðuðum hádegismatinn. Síðan var rölt í sundlaugina sem olli að venju engum vonbrigðum enda með eindæmum skemmtileg laug. Öldulaugin og rennibrautin voru mikið aðdráttarafl og vildu sumir helst ekki fara upp úr þegar að því kom. Kaffinestið var borðað fyrir utan laugina og reiðhjólin stigin aftur upp í Hraunbyrgi.

Á morgun ætlum við í dagsferð á Hvaleyrarvatn. Í hádeginu býður Útilífsskólinn upp á pylsur og djús en börnin þurfa að koma með kaffinesti. Við tökum strætisvagn upp eftir klukkan 10. Það var hins vegar villa í bréfinu sem við sendum heim í byrjun námskeiðsins en það er mikilvægt að foreldrar sæki börnin upp á Hvaleyrarvatn á milli klukkan 16 og 17 á morgun. Við biðjumst velvirðingar á þessum leiðu mistökum.

Hvar er Hvaleyrarvatn?
Ekið er um Kaldárselsveg og beygt upp til hægri inn á Hvaleyrarvatnsveg. Þar eru bílastæði.

Dagurinn hófst á gönguferð niður í fjöru. Í fjörunni var ýmislegt brallað þrátt fyrir kalt veður og týndu krakkarnir meðal annars steina í steinakarla. Um hádegið var nestið borðað í fjörunni og svo haldið aftur heim í Hraunbyrgi. Þá tók við póstaleikur þar sem við klifruðum, bökuðum hikebrauð yfir eldi, lærðum skyndihjálp, fórum í stiklað á stóru og fleira. Um hálffjögur bauð Útilífsskólinn upp á kakó og héldu svo börnin heim á leið.

Á morgun ætlum við að hjóla í sund og er því mikilvægt að allir komi með hjól, hjálm, sundföt, handklæði og nesti sem hægt er að borða á leiðinni.

Við byrjuðum námskeiðið á nokkrum kynningarleikjum og kynntu öllum hefðir skátastarfsins. Að því loknu var börnunum skipt í flokka sem þau koma til með að vinna saman í næstu daga. Því næst fundu flokkarnir sér nöfn, hróp og bjuggu til flokksfána. Eftir hádegi var farið í póstaleik þar sem börnin lærðu nokkra skátasöngva, fara í kimsleiki og einnig nokkra útileiki. Við lukum deginum á vígslu og fánaathöfn þar sem börnin fengu fína skátaklúta.

Útilífsnámskeið 7 – fimmti dagur

Við byrjuðum daginn á hefðbundnum morgunverkum ásamt hressandi morgunleikfimi. Að henni lokinni fengu börnin frjálsan tíma til að fara í gönguferð um skóginn, leika sér við vatnið og fara út á báta. Því næst var hádegismatur og tiltekt. Þegar allir höfðu gengið frá dótinu sínu var lagt af stað í Hraunbyrgi á hjólum. Þegar við komum í Hraunbyrgi þá fengu allir að klifra og fara í hoppukastala. Við vorum einstaklega heppin með veður og heppnaðist dagurinn með eindæmum vel.

Grallaranámskeið 2 – fimmti dagur

Við komum upp á Hvaleyrarvatn í blíðskaparveðri. Við byrjuðum á því að fara í stutta gönguferð kring um vatnið og fengum og okkur síðan grillaðar pylsur og djús. Að því loknu var farið í póstaleik þar sem börnin fengu að fara út á báta , leika sér í vatninu, grilla hækbrauð og sitthvað fleira. Eftir póstaleikinn var haldin síðdegisvaka þar sem sungin voru lög og sýnd skemmtiatriði sem börnin höfðu búið til fyrr um daginn. Allir fóru svo heim með bros á vör eftir góðan dag á Hvaleyrarvatni.

Útilífsnámskeið 7 – fjórði dagur

Í morgun hjóluðu krakkarnir á Hvaleyrarvatn þar sem þau munu gista í nótt, þegar komið var upp á Hvaleyrarvatn var snæddur hádegismatur og komið sér fyrir í tjöldunum. Eftir hádeigi var póstaleikur í kringum vatnið þar sem farið var á báta á vatninu, grillað hikebrauð á eldi, gerð skemmtiatriði fyrir kvöldvökuna og keppt um flottasta sandkastalann. Í kvöld verða grillaðar skátapylsur og haldin kvöldvaka þar sem skemmtiatriðin verða sýnd.

Grallaranámskeið 2 – fjórði dagur

Í morgun var farið í póstaleik, farið var í leiki, hitað kakó með prímus og var farið í látbragðsleik og fleiri skemmtilega leiki. Eftir hádegismatinn var farið í fjársjóðsleit um Víðistaðatún þar sem flokkarnir leystu þrautir og fengu að launum búta úr korti sem að lokum leiddi þau að fjársjóðskistu. Í kistunni leyndust sykurpúðar sem síðan voru grillaðir yfir eldi. Allir skemmtu sér vel og fóru glaðir heim.

Útilífsnámskeið 7 – þriðji dagur

Daginn hófum við með morgunleikfimi svo við yrðum nú vel vöknuð fyrir ævintýrin sem biðu okkar. Því næst fórum við öll saman í leiki og svo hófst póstaleikur.  Við fengum lánaðan hoppukastala sem vakti mikla lukku. Í póstaleiknum fórum við í fyrrnefndan hoppukastala, máluðum gifsgrímurnar og fengum tilsögn varðandi hvernig skal pakka fyrir ferðir. Við marseruðum svo í Suðurbæjarlaug í sund. Mikið fjör var í sundi og ekki voru alveg allir tilbúnir að fara upp úr á tilskyldum tíma. Upp úr fóru þó allir og gengin var kraftganga aftur upp í skátaheimili.

Við minnum á að sérlega mikilvægt er að vera mætt klukkan tíu á morgun með hjól, farangur, nesti og góða skapið.

Grallaranámskeið 2 - þriðji dagur

Við héldum okkur í grenndinni í dag. Farið var í tvo póstaleiki. Í þeim fyrri príluðum við í klifurveggnum, límdum saman steinana sem við völdum í fjörunni, brutum pappírsbáta og sigldum þeim á tjörninni og lærðum á snjóflóðaýla. Eftir póstaleikinn fórum við út að borða á túninu, lítt þekktur staður en nestið bragðaðist víst stórvel þar. Í seinni póstaleiknum fórum við í hoppukastalann, máluðum fyrrlímda steinakalla og fórum í nokkra vel valda leiki.

Útilífsnámskeið 7 - annar dagur

Við héldum okkur í nánd við húsið í dag. Fyrir hádegi var póstaleikur með klifri, gifsgrímum og leikjum. Eftir hádegi tók annar póstaleikur við. Í seinni póstaleiknum var farið í blindragöngu, sagt frá ýmsum staðreyndum varðandi íslenska fánann (fánareglur, kennt að flagga og brjóta hann saman), súrrað skýli og hituð núðlusúpa á prímus.

Á morgun förum við í sund. Við minnum alla á að taka með sér sunddót.

Grallaranámskeið 2 – annar dagur

Grallararnir héldu af stað á vit ævintýranna í dag. Þeir fóru í fjöruferð fyrir hádegi, í henni var mikið fjör og mikið buslað. Grallararnir borðuðu nestið sitt í fjörunni og héldu svo til baka. Í Hraunbyrgi tók við póstaleikur. Þá var farið í klifurvegginn, rennt yfir helstu atriði í skyndihjálp, poppað yfir eldi og haldnir voru litlir ólympíuleikar. Þá var komið að drekkutíma, að honum loknum var farið í nokkra stóra leiki niðri á túni.

Útilífsnámskeið 7- fyrsti dagur

Við hófum daginn á kynningarleikjum á túninu fyrir framan slottið og skiptum svo í flokka. Að þessu sinni eru flokkarnir fjórir og bera nöfnin MEK, Strumparnir, Nammipokinn og Fönixfuglarnir. Flokkarnir gerðu svo hver sinn fána og svo var kominn tími á hádegismat. Eftir mat var vígsla í Útilífsskólann og því næst tók við stórskemmtilegur póstaleikur. Í póstaleiknum var poppað yfir eldi, farið í Kims leiki, sungin voru skátalög, haldnir voru litlir ólympíuleikar og rennt yfir helstu atriði í skyndihjálp.

Grallaranámskeið 2- fyrsti dagur

Krakkarnir tíndust í hús upp úr níu og upp úr tíu var farið í kynningarleiki og því næst skipt í flokka. Flokkarnir eru fjórir þessa vikuna. Þeir heita Kaboom, Stjörnurnar, Gúmmítútturnar og Svarta leynifélagið. Flokkarnir gerðu hver sinn fána og snæddu svo hádegisverð. Þegar allir voru orðnir mettir var farið í póstaleik. Í póstaleiknum var farið í kims leiki, blindragöngu, stiklað á stóru og sungin voru nokkur vel valin lög. Í lokin voru grallararnir vígðir og héldu svo flestir heim á leið.

Í dag var farið í dagsferð að Hvaleyrarvatni. Við komuna að vatninu fórum við í gönguferð í kringum vatnið þar sem börnin voru dugleg að syngja og hafa gaman. Því næst fórum við í nokkra leiki og fengum okkur síðan grillaðar pylsur og djús. Eftir hádegi var svo farið í póstaleik þar sem börnin bjuggu til sandkastala, fóru í leit með snjóflóðaýlu, fóru í leiki og bjuggu til skemmtiatriði. Eftir það fengu börnin sér smá nesti og komu sér svo fyrir í laut skammt frá vatninu. Þar var haldin síðdegisvaka þar sem sungin voru lög við góðar undirtektir og börnin fengu að sýna skemmtiatriði sem þau höfðu búið til fyrr um daginn.