Útilífsskóli Hraunbúa

Búið er að opna fyrir skráningu í Útilífsskólan fyrir sumarið 2012. Hægt er að skrá sig hérna. Allar upplýsingar má finnt hér á heimasíðinni okkar. Einnig er hægt að hringja í síma 824-0906 eða hafa samband í gengum tölvupóst, utilifsskoli@hraunbuar.is

**   Ýtið á myndina til að sjá stærri útgáfu af henni   **

Í dag fórum við með alla krakkana í dagsferð á Hvaleyrarvatn. Rútan kom að sækja okkur rétt rúmlega 10 og þegar við komum á svæðið byrjuðum við strax í stórum, sameiginlegum póstaleik. Krakkarnir fóru á kanó, grilluðu hikebrauð að skátasið, byggðu sandkastala, leituðu að dúkkunni Móra, skoðuðu náttúruna í kring, lærðu á áttavita, fóru í leiki og sungu svolítið saman. Allir fengu pylsur og djús í hádeginu og voru flestir mjög svangir eftir amstur morgunsins. Í lok dagsins löbbuðum við svo yfir á ströndina þar sem krakkarnir vöðuðu og biðu eftir foreldrum sínum.

Við minnum svo á skátastarfið í vetur sem er fyrir alla krakka 7 ára og eldri Nánari upplýsingar verða sendar í tölvupósti.

Takk kærlega fyrir mjög skemmtilega viku !

Í dag byrjuðu grallararnir á því að búa til póstkort, setja þau í umslög og svo fengu þau sér göngutúr niður í fjörð til að setja póstkortin í póst. Næst löbbuðu þau að læknum og gáfu öndunum fullt af brauði. Þau borðuðu hádegismat á Thorsplani og löbbuðu svo aftur upp í skátaheimili þar sem þau fóru í póstaleik. Í póstaleiknum máluðu þau steinakarlana sína, klifruðu í klifurveggnum, fóru í leiki og héldu víkingaleika.

Skátarnir á Útilífssnámskeiðinu hófu daginn á fjársjóðsleit þar sem þau fengu ýmsar þrautir til að leysa. Ef þau leystu þrautina fengu þau hluta af fjársjóðskorti og eftir hádegismat gátu þau sett kortin saman og farið að leita að fjársjóðnum. Fjársjóðurinn reyndist vera sykurpúðar og voru þeir borðaðir með bestu lyst. Seinni hluti dagsins fór í götuleik þar sem þau þurftu að telja listaverkin á Víðistaðatúni, telja gluggana á Víðistaðakirkju, finna blómategundir í Hellisgerði og fylla flösku af sjó hjá gömlu sundlauginni. Götuleikurinn gekk mjög vel og komu allir krakkarnir glaðir til baka.

Við viljum svo minna á dagsferðina á Hvaleyrarvatni á morgun, munið að mæta stundvíslega kl. 10

Í dag fóru skátarnir saman í hjólaferð. Fyrst var ferðinni heitið að Garðaholti þar sem við borðuðum hádegismat og svo hjóluðum við lengra þar sem við fórum í sandfjöru. Í fjörunni skemmtu krakkarnir sér mjög vel við að leita að kröbbum, vaða í sjónum, skoða marglittur og tína skeljar. Þegar krakkarnir voru orðnir svangir borðuðu þau nesti aftur hjá Garðaholti og svo fórum við í marga skemmtilega leiki. Krakkarnir hjóluðu svo aftur upp í skátaheimili með bros á vör eftir góðan dag í glæsilegu veðri.

Í morgun héldu grallararnir af stað í fjöruna þar sem þau tíndu steina í steinakarla, fleyttu kerlingum, leituðu að kröbbum og margt fleira. Þegar krakkarnir voru búnir að borða nestið sitt í fjörunni röltu þau til baka og fóru í stórskemmtilegan póstaleik. Í póstaleiknum lærðu þau að súrra, lærðu helstu atriðin um íslenska fánann, hituðu sér kakó á prímus, límdu steinakarlana sína saman og fóru í blindraþraut. Allir fóru svo sáttir heim eftir góðan dag

Í dag, þriðjudag, fóru skátarnir í fjöruferð. Í fjörunni tíndu þau steina í steinakalla, lærðu að fleyta kerlingum og léku sér við ýmislegt. Við borðuðum hádegismatinn okkar í fjörunni og löbbuðum svo í gegnum hraunið á leiðinni til baka. Eftir fjöruferðina var póstaleikur þar sem krakkarnir hituðu kakó á prímus, límdu steinakarlana sína, héldu víkingaleika, fóru í nokkkra skátaleiki og lærðu helstu atriðin um skyndihjálp.

Fyrir hádegi fóru grallararnir í póstaleik þar sem þau klifruðu í klifurveggnum, bjuggu til galdraseyði, fóru í kimsleiki og fleiri skemmtilega leiki. Eftir hádegi hófst æsispennandi fjársjóðsleit þar sem þau þurftu að leysa ýmis verkefni til að fá bút af fjársjóðskorti. Meðal verkefnanna var að búa til sjúkrabörur og bera hvort annað á þeim, gera mannlegan pýramída, búa til línu úr sokkunum sínum, finna fullt af orðum sem byrja á sama staf og fleira. Eftir að krakkarnir voru búnir að fá alla bútana úr fjársjóðskortinu fóru þau að leita að fjársjóðnum. Eftir mikla leit fundu þau fjársjóðskistuna hjá kirkjunni fulla af sykurpúðum sem þau fengu svo að grilla yfir eldi.

Takk fyrir daginn krakkar

Í dag hófust síðustu námskeið sumarsins, grallaranámskeið (6-7 ára) og útilífsskólanámskeið (8-12 ára). Í þessu blíðskaparveðri þeyttust skátar og grallarar um svæðið þar sem þau fengu að prófa ýmislegt. Til dæmis fengu grallararnir  að poppa popp yfir eldi, prófa mini Ólympíuleika, skátaleiki og lærðu skyndihjálp. Skátarnir klifruðu í klifurveggnum, fóru í blindraþraut, leystu Kims þrautir og héldu á litlu Ólympíuleikana.

Í lok dagsins voru allir vígðir inn í Útilífsskólann og fengu grallararnir bláa klúta og skátarnir gula klúta.

Á morgun fara grallararnir í fjársjóðsleit og skátarnir í fjöruferð. Munið því að taka stígvél og kannski handklæði.

Takk fyrir daginn

Eftir að allir voru mættir á fimmtudag var farangrinum komið fyrir í bílunum og krakkarnir settu á sig hjálma og gerðu sig tilbúin fyrir hjólaferð. Farið var yfir reglur og lagt af stað. Þegar við komum á Hvaleyarvatn var sest að snæðingi og svo hófst póstaleikur. Í honum fóru allir á kanó, grilluðu hike -brauð,  leituðu að Móra, lærðu hnúta og gerðu skemmtiatriði.

Um fjögurleytið var frjáls tími fram að mat þar sem allir skemmtu sér í skóginum eða við vatnið. Svo voru pylsur grillaðar og ekta skátakvöldvaka í framhaldinu þar sem allir fóru á kostum. Þá fengu allir heitt kakó og síðan var skriðið ofan í poka.

Í dag, föstudag, vöknuðu allir um átta og var morgunmatur borðaður og pakkað saman. Enn einn póstaleikurinn hófst þar sem farið var á kanó í þessu frábæra veðri, flöskuskeyti skrifuð, sandkastalar byggðir og  farið í náttúruskoðun.  Svo var hádegismatur og um tvöleytið var lagt af stað heim á leið. Hjólaferðin gekk vel og fóru allir sáttir heim.

Takk fyrir frábæra viku krakkar

Á þriðja degi Útilífsskólans var risa stór ævintýrafjársjóðsleit. Skátarnir þeyttust um allan Hafnarfjörð og leystu hin ýmsu verkefni, sem voru meðal annars að telja gluggana á Víðistaðakirkju, finna 8 örnefni uppi á Hamri, finna bláan borða merktan flokknum hangandi í tré í Hellisgerði, telja tröppurnar í Flensborg og fylla flösku af sjó í fjörunni. Á hverri stöð fengu þau hluta að fjársjóðskorti.

Þegar fimm af sex bútum voru komnir enduðu þau upp í Hraunbyrgi en þá var ekki allt búið enn. Þurftu þau að leysa dulmál á fána og finna síðan síðasta bútinn af fjársjóðskortinu. Samkvæmt kortinu átti fjársjóðurinn að leynast hjá kirkjunni en hvaða alvöru sjóræningi felur hann ekki í sandinum? Þau fóru þá á strandvöllinn og þurftu að byrja að grafa eftir kistunni. Loksins fundu þau hana en hún var því miður læst. Lykillinn fannst svo hjá einu listaverkinu á Víðistaðatúni og þá gátu þau opnað kistuna. Í kistunni reyndust vera pokar merktir flokkunum með sykurpúðum sem þau fengu svo að grilla yfir eldi.

Í lok dags fengu krakkarnir að mála steinakallana sína og fóru í leiki á túninu. Þetta var mjög viðburðaríkur dagur og efumst við ekki um að allir fari heim með bros á  vör.

Fjórða vika hófst með pompi og prakt í gær þegar 23 krakkar mættu eldhressir í morgunsárið. Eftir kynningarleiki og flokkamyndun var póstaleikur þar sem allir fengu að spreyta sig í kassaklifri og læra skyndihjálp. Einnig var blindraþraut, þar sem bundið var fyrir augun og þau fengu að upplifa svæðið á tánum fylgjandi línu. Svo var gert galdraseyði á prímus og farið í Kims leiki og litlu Ólympíuleikarnir haldnir. Í lok dagsins voru allir vígðir inn í Útilífsskólann með gulum klút og jöklavatni.

Í dag, þriðjudag, var farið í fjöruferð. Þar skemmtu sér allir konunglega við að vaða, fleyta kellingar, finna óskasteina og steina í steinakalla og krabba. Eftir fjöruferðina var farið í póstaleik þar sem kakó var hitað á prímus, steinarnir límdir og haldnir Víkingaleikar. Svo lærðu krakkarnir líka skátadulmál og ýmislegt um íslenska fánann.

Minnum á útileguna á fimmtudaginn. Takk fyrir dagana og sjáumst á morgun